29 тамыз, бейсенбі күні Таяу Шығыста Газа секторындағы қақтығыс және Иран мен Израиль арасындағы өңірлік шиеленіс төңірегінде не болғаны туралы оқыңыз.
— Израиль қорғаныс Армиясы сәрсенбі күні терроризмге қарсы ауқымды операцияның басталғаны туралы мәлімдегеннен кейін Біріккен Ұлттар Ұйымының Бас хатшысы Антониу Гутерриш Израильді Батыс жағалаудағы әскери операцияларды тоқтатуға шақырды.
Гутерриштің баспасөз хатшысы Стефан Дюжаррик бас хатшының Батыс жағалаудағы соңғы оқиғаларға «қатты алаңдаушылық білдіретінін» және «адамдардың, соның ішінде балалардың қаза болуын қатаң айыптайтынын» айтты.
— Байден әкімшілігі Израильді «Иордан өзенінің батыс жағалауындағы бейбіт тұрғындардың өмірін қорғау үшін барлық шараларды қабылдауға» шақырды.
«Біз Израильдің қауіпсіздік саласындағы нақты қажеттіліктерін, соның ішінде Батыс жағалаудағы террористік әрекеттерге қарсы тұру қажеттілігін мойындаймыз. Сонымен бірге біз Израиль билігі барлық бейбіт тұрғындарды қауіптен қорғау үшін тиісті шара қабылдауын талап етеміз», — делінген Мемлекеттік департамент өкілінің мәлімдемесінде.
Израиль полициясы мен ШАБАК мәліметінше, бейсенбіге қараған түні Израиль күштері Иордан өзенінің батыс жағалауындағы Тулькарм қаласындағы мешітте жасырынған бес палестиналық содырды өлтірді.
Мәлім болғандай, Тулькармда шекара полициясының «Ямам» лаңкестікке қарсы бөлімшесінің жауынгерлері олардың орналасқан жері туралы жедел ақпарат алғаннан кейін мешітті паналаған бір топ содырмен шайқасқа шыққан. Әскерилердің айтуынша, атыстан бес палестиналық содыр қаза тауып, бір израильдік офицер жеңіл жараланған.
— Еуроодақтың сыртқы саясат жөніндегі басшысы Жозеп Боррель мүше мемлекеттерден «кейбір израиль министрлеріне» қарсы санкциялар енгізгісі келетін-келмейтінін сұрау процесін бастағанын айтты.
Саясаткер сөз болып отырған израильдік министрлердің ешқайсысының атын атамады, бірақ көптеген хабарларда олардың арасында Қаржы министрі Бецалель Смотрич пен Ұлттық қауіпсіздік министрі Итамар Бен Гвирдің аты аталды.
Бұған Ирландияның Сыртқы істер министрі реакция білдірді. Ведомство басшысы оның елі Еуропалық Одақтың сыртқы саясат басшысы Жозеп Боррельдің әсіре оңшыл израильдік министрлерге, сондай-ақ «елді мекендердің кеңеюіне ықпал ететін» Батыс жағалаудағы қоныстандыру ұйымдарына қарсы санкциялар енгізу туралы ұсынысын қолдайтынын айтты.
— Израиль әскери ұшақтары Ливанның оңтүстігіндегі Кафр-Килада Хезболла пайдаланатын ғимараттарға соққы берді, деп хабарлады Израиль қорғаныс күштері.
Бұған қоса, жақында Ливаннан ұшырылған жарылғыш заттар тиелген бірнеше ұшқышсыз ұшақ Голан жоталарының солтүстігіне құлады.
– АҚШ-тың ұлттық қауіпсіздік жөніндегі кеңесшісі Джейк Салливан Газа секторында атысты тоқтату және кепілге алынғандарды босату жөніндегі келіссөздер ілгерілегенін айтты.
«ХАМАС Газа секторында жергілікті халықты полиомиелитке қарсы вакцинациялау үшін жеті күндік гуманитарлық бітімге келісті», — деп хабарлайды Лондондағы араб тіліндегі Al-Araby Al-Jadeed жаңалықтар сайты.
ДДСҰ Израиль Газа секторында полиомиелитке қарсы вакцинациялау науқанын жүргізу үшін шектеулі «гуманитарлық үзілістерге» келісті деп мәлімдеді.
Біріккен Ұлттар Ұйымы Газа секторындағы 640 мыңға жуық балаға екпе салуға дайындалып жатыр. 23 тамызда ДДСҰ кем дегенде бір баланың 2 типті полиомиелит вирусымен сал ауруына шалдыққанын растады, бұл аумақта соңғы 25 жылдағы алғашқы жағдай.