Астана әкімі Жеңіс Қасымбек елордада су тасқынының алдын алу шаралары жүзеге асырылып жатқанын мәлімдеді. Бұл туралы ол Facebook парақшасында жазды.
Қала әкімінің сөзінше, қыста қар молынан жауды.
«Қыс мезгілінің басынан бастап қаланың коммуналдық қызметтері 7,8 млн текше метрден астам қар шығарды. Қалада су тасқынының алдын алу бойынша белсенді жұмыс жүргізіліп жатыр», — деп мәлімдеді ол.
Қала басшысының ақпаратына сәйкес, жалпы алғанда 65 000 метр арық-науа желісі тазартылып, 27 мыңнан астам метр коллекторлар жуылды, сондай-ақ 1 мың 340 тоннадан астам тұнып қалған лай шығарылды. Жедел әрекет ету үшін азаматтық қорғаныстың арнайы тобы құрылды.
Сондай-ақ гидротехникалық құрылыстарды қайта жаңғырту мен нығайтуға ерекше көңіл бөлінеді.
«Атап айтқанда, арнайы реттегіште Жібек жолы ауылы ауданындағы Есіл өзенінің 3,8 шақырымнан астам ескі арнасы тазартылды, сол сияқты Нұра өзеніне су бұру және су бұру арнасын салу жұмысы аяқталуға жақын», — деп хабарлады қала әкімі.
Оның сөзінше, Майбалық көлінде ұзындығы 5,4 км жалғастырушы арна тазартылды.
«Бұл су бұру жұмысын жақсартуға және су тасқыны кезінде қаладағы жүйеге түсетін жүктемені азайтуға мүмкіндік береді», — деп мәлімдеді қала басшысы.
Елорда әкімінің хабарлауынша, су тасқынының алдын алу шаралары аясында өзен арналары мен арықтар тазартылып, кеңейтіліп жатыр.
«Алматы ауданындағы индустриалды паркте еріген қар суын өткізу қабілетін арттыратын Ақбұлақ арнасы тазартылып, айналма канал орнатылуда. Сонымен қатар Тельман ауданындағы су сорғы станциясын қорғау шаралары жүргізіліп жатыр», — деп жазды Жеңіс Қасымбек.
