Бүгін Мемлекет басшысы Қасым-Жомарт Тоқаев Астанадағы Expo көрме орталығындағы этноауылда Наурыз мерекесін жұртшылықпен бірге қарсы алды. Салтанатты іс-шараға қоғам қайраткерлері де қатысты. Олардың бірі — Қазақстан халқы Ассамблеясының Кеңес мүшесі, Қазақстандағы тәжіктердің республикалық этномәдени орталығының төрағасы Акбаржон Исмаилов.
“Ұлыстың ұлы күні – ұлтымыздың ұлық мейрамының қарсаңында Мемлекет басшысы Қасым-Жомарт Тоқаевпен бірге Expo көрме орталығындағы этноауылда Наурыз мерекесін қарсы алу рәсіміне қатыстым.
Президент мерекелік іс-шараға жиналған көпшілікті Наурыз мейрамымен құттықтап, жылы лебізін жеткізді. Қасым-Жомарт Тоқаев былтырдан бастап мереке жаңа тұжырымдамаға сәйкес он күн бойы аталып өтетініне назар аударып, Наурызнаманың әр күні тағылымға толы екенін айтты.
Оған қоса, Мемлекет басшысы биыл Конституциямызға және Қазақстан халқы Ассамблеясына 30 жыл толатынын, сондай-ақ Ұлы Жеңістің 80 жылдығын атап өтенімізді баса айтты.
«Біз «Заң мен тәртіп» қағидасы берік орныққан, әділетті, қауіпсіз, таза, мәдениетті және дамыған Қазақстанды міндетті түрде бірге құрамыз! Қазақстаннан басқа еліміз жоқ. Сондықтан бәріміз бір қоғам болып мемлекетімізді нығайтайық, дамытайық, көркейтейік» деді өз сөзінде Президент”, — деп атап өтті Акбаржон Исмаилов.
